A 82 lane sou tèt li, Mirlande Hyppolite Manigat se youn nan gwo fanm politik ak entèlektyèl Haïti genyen. Pwofesè a toujou mete li disponib pou ede peyi li, swa nan travay entèlektyèl oubyen nan patisipasyon li nan aksyon politik pou ede peyi li avanse. 21 desanm 2022, non Mirlande H. Manigat site pami twa moun ki deziye pou fòme wo konsèy tranzisyon ki pral travay ak gouvènman Ariel Henry a pou òganize eleksyon jeneral ki dwe abouti ak yon prezidan k ap enstale sou pouvwa a 7 fevriye 2024.
Konstitisyonalis la te eli senatè repiblik la pandan kout peryòd kote defen mari li, Lesly François Manigat, te prezidan peyi a soti fevriye pou rive jen 1988. Li te refize dezyèm manda li kòm senatè an 2006, apre mari li te fin pèdi eleksyon prezidansyèl yo nan yon sikonstans eksepsyonèl. Se vre, an 2011, Mirlande H. Manigat te youn nan kandida favori pou prezidans peyi a, men li te fini dezyèm nan kous la.
Depi apre lanmò mari li, 27 jen 2014, se Mirlande ki t ap dirije pati politik Rasanbleman Demokrat Nasyonal Pwogresis (RDNP), jis li te vin remèt direksyon pati a bay defen Eric Jean Baptiste, ki mouri ansasinen vandredi 28 oktòb 2022 a.
Antank espesyalis nan konstitisyon, Pwofesè Mirlande Manigat te patisipe nan elaborasyon konstitisyon 1987 la. Jodi a, li pami twa (3) manm konsèy tranzisyon yo, e li reprezante pati politik yo. Youn nan travay konsèy li ladan an pral gen pou fè, se revize konstitisyon an pou ede li matche ak sitiyasyon politik aktyèl yo.
Nan patisipasyon, enklizyon ak ouvèti lespri pou ede peyi li, Mirlande H. Manigat se yon modèl pou chak jèn fanm ki gen lide avantire yo nan mond politik la an Haïti. Li se yon eksepsyon, pou sila ki toujou wè koze politik an Haiti ak move je. Mirlande Hyppolite Manigat se yon ayisyen ki fè valè fanm yo nan mond politik la.
You may also like
-
Corventina est la nouvelle ambassadrice de la Sogebank
-
Martine Moïse demeure dans le collimateur de la justice haïtienne
-
Lourdjina Etienne sacrée meilleure joueuse du championnat U17 de la CONCACAF 2024
-
Mère Lalue ferme ses portes pour assurer la sécurité de ses occupants
-
La prison civile des femmes de Cabaret prise d’assaut par des hommes armés
French
Arabic
Chinese (Simplified)
Dutch
English
German
Haitian Creole
Italian
Portuguese
Russian
Spanish